Moders schorte

Gedicht moeders schort, vertaald door 'onze' Arie Ribbers

Van mien moo eur schorte
Wil ik oe wat vertellen
Hee is heel eenvoudig
maor méér as dure bontvellen

Mien moo eur schorte
Dén was maor van katoen
Zee droog ‘m alle dage
Zo was ze in eur doen

Mien moo droog een schorte
Een bonten deur de week
Een witten veur de zundag
Dén dan wel deftig leek

Ik zee mien moo eur schorte
Met brood d’r tegenan
Door maken ze een kruuske op
Pas dan snee ze ‘m an

Mien moder eure schorte
Door krop ik geerne onder
Verleagen veur de mensen
Of bange veur hel en donder

Onder moders schorte
Dat worden nooit ezeg
Zat ieder joor een kindje
Veur ons schaoven ze ‘t weg

Moder hef op eur schorte
Al heel wat luiers espeld
D’n enen kleinen was nog neet dreuge
Of van d’n andern was ze uut-eteld

Met moder eur schorte
Onderan de rechtse tip
Maken ze ons de oorne schone
Of vaegden ons krummels van de lip

Mien moder eure schorte
Was altied biej de hand
De neuze vaegden wie d’r an af
Wie waarn jao vaste klant

In moder eure schorte
Dat he’k nog neet verteld
Worden de bonen edöpt
En de eerpeltjes escheld

In moder eure schorte
Dat was vrogger zo esteld
Wodden op vriejdagaovend
’t wekgeld van mien breurs eteld

As mien moder eure schorte
Tut op d’n draod versletten was
Kwam e as stof- of wasseldoek
Nog altied good van pas

Onder moders schorte
Laefden een tevraeden ziel
Dee alles an ‘hierbaoven’ leet
Ok at ‘r wat te treuren viel

Onder mien moders schorte
Zatten neet de duurste klere
Maor kloppen wal een heel groot hart
Waor’w nog völle van könt leren

Op moder eure schorte
Worden ’t bidden ons eleerd
Zo’n schorte draagt ze noe neet meer
Lik bidden haost verkeerd

Tegen moders schorte
Wordt ’t brood neet meer esnene
Want as ’t van de bakker kump
Is ’t leed al lange elene

Onder mien moders schorte
Was ’t as kind good toeven
Noe bun’k d’r wal van aovertuugd
Da’k ’t neet meer zol hoeven

Onder moders schorte
Door kroep ik neet meer onder
Verlaegen bun ik noe neet meer
Of bange veur hel en donder

Onder de schorte van mien moo
Door zat gin feministe
Maor gezag dat had ze wal
Eur woord was ’t leste en ‘t wieste